Fréttir

Íbúðalánasjóður: Aðeins 40 fasteignir á leigumarkað

Aðeins 40 fasteignir í eigu Íbúðalánasjóðs munu rata á leigumarkað á næstunni, en framkvæmdastjóri sjóðsins hafði áður gefið til kynna að þær gætu orðið allt að þrefalt fleiri. Leggja hefði þurft út í hundruð milljóna kostnað til að gera allar fasteignirnar íbúðarhæfar.

Á fundi stjórnarformanns og framkvæmdastjóra Íbúðalánasjóðs og velferðarráðherra í ágúst var ákveðið að kanna möguleika á því að setja hluta af eignum sjóðsins á leigumarkað til að mæta mikilli eftirspurn eftir leiguhúsnæði. Þá gaf framkvæmdastjóri sjóðsins til kynna að allt að 130 fasteignir á höfuðborgarsvæðinu af þeim 1400 sem sjóðurinn hefur leyst til sín gætu ratað í útleigu.

Þegar starfsmenn sjóðsins huguðu að ástandi eignanna blasti hins vegar við að bygging margra þeirra var afar skammt á veg komin. Að sögn Ágústs Kr. Björnssonar, sviðsstjóra eignasviðs sjóðsins, hefði þurft að leggja út í kostnað upp á fimm til sexhundruð milljónir króna til að fullbyggja eignirnar og gera þær íbúðarhæfar. Stjórn sjóðsins hafi að teknu tilliti til hlutverks Íbúðalánasjóðs ákveðið að leggja ekki út í þann kostnað að sinni.

Niðurstaðan er því sú að aðeins verður ráðist í viðhaldsframkvæmdir við um 40 eignir til að gera þær útleiguhæfar, en Ágúst býst við að þær verði komnar í útleigu fyrir áramót. Hann vísar því á bug að sjóðurinn hafi hlaupið á sig þegar fullyrt var að 130 eignir gætu ratað á markað, en þegar kostnaður við það hafi legið fyrir hafi stjórn sjóðsins einfaldlega tekið ákvörðun um að horfa til 40 eigna.

Ekki náðist í Sigurð Erlingsson, framkvæmdastjóra Íbúðalánasjóðs, við vinnslu fréttarinnar.  Lesa meira ...

Smelltu hér til að skrá þig sem kaupanda 

Smelltu hér til að skrá eignina þína á sölu

Sendu okkur póst til að fá nánari upplýsingar eða hringdu í síma: 519-2600.