Fréttir

Heildarfasteignamat íbúða fer í tæða fimm þúsund milljarða á næsta ári

Grein frá Stöð 2 fréttir kl. 18:30, 02.06.2017

 

Fasteignamat íbúðar- og atvinnuhúsnæðis á Íslandi fyrir næsta ár er 7.300 milljarðar króna og hækkar að meðaltali um 13,8% frá þessu ári. Hækkun á mati íbúðarhúsnæðis er mest á Húsavík af öllum bæjum landsins, eða 42,2%, sem formaður Byggðaráðs bæjarins skrifar á aukna ferðaþjónustu og framkvæmdir á Bakka. Fasteignaverð á höfuðborgarsvæðinu hefur hækkað mjög mikið á undanförnum árum enda skortur á íbúðarhúsnæði. Fasteignamat fyrir næsta ár hækkar mest hér í Blesugróf, eða 27,8%. Þá verður heildarverðmæti íbúðarhúsnæðis á landinu öllu orðið tæpar 5 billjónir króna. Meðaltalshækkun fasteignamats íbúðarhúsnæðis á landinu öllu er 15,5%, á höfuðborgarsvæðinu er meðaltalshækkun í sérbýli 17,5% og 15,4% í fjölbýli. Hækkunin er örlítið minni utan höfuðborgarsvæðisins eða 12,2% í sérbýli og 13,7% í fjölbýli. Húsavík sker sig hins vegar úr hvað varðar hækkun fasteignamats í einstökum bæjarfélögum en þar hækkar matið um hvorki meira né minna en 42,2% og í sveitarfélaginu Kjósarhreppi er hækkunin svipuð, eða 41,3%. Formaður byggðaráðs Húsavíkur og Norðurþings segir uppbygginguna á Bakka hluta af skýringunni á mikilli hækkun fasteignamats. Óli Halldórsson, formaður byggðaráðs Norðurþings: Þá hefur ferðaþjónustan verið að eflast mjög hratt á Húsavík og það er alveg ljóst að þessir tveir þættir eru kannski mest afgerandi í þessari hækkun á húsnæðisverði. Þar sem ferðaþjónustan bæði fyrir starfsfólk og kúnna pressar á húsnæðismarkaðinn en einnig auðvitað þessi uppbyggingartími á Bakka. Af einstökum hverfum á höfuðborgarsvæðinu er hækkunin mest í Blesugróf í Reykjavík, eins og áður sagði, eða 27,8% og síðan í neðra Breiðholti, 21,5%, og Fellum, 20%. Í miðborginni er meðaltalshækkunin í kringum 16% en getur þó farið vel yfir 20% á einstökum svæðum miðborgarinnar. Heimir Már Pétursson: Það eru búnar að vera miklar hækkanir mörg ár í röð, er það gott? Kjartan Hallgrímsson, formaður Félags fasteignasala: Það er alltaf betra að hækkanir séu jafnt og þétt, í takti við kaupmátt og aðstæður í landinu þannig að þessar öru hækkanir frá síðasta ári, ég get ekki sagt að þær séu slæmar, en þær hefðu mátt vera jafnari. Heimir: Eftirspurnin er auðvitað gífurleg, sérstaklega hér á höfuðborgarsvæðinu? Kjartan Hallgrímsson: Já, eins og staðan er í dag vantar okkur íbúðir inn á markaðinn. Í augnablikinu er lítið til sölu þótt við sjáum fram á að það eigi eftir að batna á næstu misserum. 

 

Smelltu hér til þess að lesa greinina í heild

 

Smelltu hér til að skrá þig sem kaupanda 
Smelltu hér til að skrá eignina þína á sölu
Sendu okkur póst til að fá nánari upplýsingar eða hringdu í síma: 519-2600