Fréttir

Sérstakt úrræði til fyrstu fasteignakaupa rennur út á sunnudag

Grein af stöð 2 28.12.2017

Fjöldi Íslendinga gæti misst af sérstöku úrræði vegna kaupa á fyrstu fasteign ef ekki er sótt um fyrir næsta sunnudag. Um er að ræða heimild til að ráðstafa séreignasparnaði inn á fasteignalán í allt að 10 ár. Sviðsstjóri hjá Ríkisskattstjóra segir fjölmargar umsóknir hafa borist síðustu daga. Hersir Aron Ólafsson segir frá þessu. Með lögum sem tóku gildi 1. júlí síðastliðinn var einstaklingum heimiluð skattfrjáls úttekt séreignasparnaðar vegna kaupa á fyrstu íbúð. Heimildin er þó bundin ýmsum skilyrðum en þannig þarf umsækjandi að eiga minnst 30% eignahlut og ekki mega vera fleiri en 2 eigendur. Þá er það skilyrði að sótt sé um úrræðið ekki síðar en 12 mánuðum frá undirritun kaupsamnings. Lögin tóku við af eldra úrræði frá 2014 en þar var heimilt að nýta sér séreignasparnað til ráðstöfunar inn á lán á 3. ára tímabili. Með nýja úrræðinu er fyrstu kaupendum hinsvegar gert kleift að nýta sér séreignasparnaðinn á samfelldu 10 ára tímabili. Þeim sem keyptu sér fyrstu fasteign á tímabilinu frá 1. júlí 2014 til 30. júní 2017 er einnig unnt að nýta sér úrræðið. Umsóknarfrestur þessara einstaklinga rennur hinsvegar út í árslok 2017 eða eftir 3 daga.

Jarþrúður Hanna Jóhannsdóttir, sviðsstjóri atvinnurekstrarsviðs RSK: Það er sem sagt bara ákveðið að hafa einhver skil á því hvenær fólkið yrði að vera búið að sækja um og það var ákveðið sem sagt að það yrði áramót fyrir þá sem voru búnir að kaupa áður en þessi lög tóku gildi. Hersir Aron Ólafsson: Og þeir sem að hafa í raun og veru, gleyma að sækja um fyrir næsta sunnudag, þeir geta þá ekki nýtt sér úrræðið eða hvernig? Jarþrúður Hanna Jóhannsdóttir: Nei, þá eru þeir í rauninni úti en þeir geta farið inn í eldra séreignasparnaðarúrræðið en það gildir eingöngu til 30. júní 2019. Þannig að þá eru þeir ekki inni í þessum 10 ára fasa. Jarþrúður segir að líklega sé stór hópur sem hreinlega hafi ekki áttað sig á tilvist úrræðisins en gríðarlegur fjöldi umsókna hafi borist skattstjóra síðustu daga. Jarþrúður Hanna Jóhannsdóttir: Við sendum sem sagt núna 20. desember, sendum við tölvupóst á svona ákveðinn hóp, sem að við, markhóp sem við töldum vera líklegan og það voru vægast sagt mjög góð viðbrögð og hafa komið um 1.300 umsóknir núna frá 20. desember. En hvernig er þá staða þeirra sem hafa þegar keypt sér fyrstu íbúð en eru enn ekki farnir að greiða í séreign eða lífeyrissjóð? Jarþrúður Hanna Jóhannsdóttir: Það er náttúrulega mjög knappur tímarammi til þess en við hvetjum alla til þess að setja umsókn inn í gegnum skattur.is og ganga svo strax frá því að fara að greiða í sjóð því að þá mundi það geta gilt frá janúar, greiðslurnar.

 

Smelltu hér til þess að sjá greinina í heild

Smelltu hér til að skrá þig sem kaupanda 
Smelltu hér til að skrá eignina þína á sölu
Sendu okkur póst til að fá nánari upplýsingar eða hringdu í síma: 519-2600